訓練

踏入9月相信大家已經開始操練多時，係時候將訓練變得更加有效率。

1. 平日練習

加入閒日或放工後跑約10K或以上，每星期一至兩課或以上，最好有上落斜，以增加心肺功能。

中環上山下海跑

路線︰花園道室內運動場 > 纜車徑 > 寶雲道 > 黃泥涌峽道 > 深水灣道 > 麗海堤岸路(來回) > 苗鐘徑 > 黃竹坑道 > 南風道 > 深水灣道 > 布力徑 > 灣仔峽道 > 堅尼地道 > 花園道室內運動場
特色︰長跑練習/ 斜路較多/ 多水機及油站補給
距離︰約23公里

東區跑14K之 < 墳場睇夜景 >

路線︰鰂魚涌 > 愛秩序灣海濱公園 > 阿公岩道 > 柴灣道 > 東區醫院 > 永泰道 > 安業街 > 小西灣運動場 > 歌連臣角上路 > 連城道 > 環翠道 > 柴灣道 > 愛秩序灣海濱公園 > 鰂魚涌
特色︰長跑練習
距離︰約14公里

2. 週末恆常操練

每次行兩段麥徑試路，分五次完成十段麥徑，對全段麥理浩徑有個初步印象。能力許可下，每次練習增加到三至四段，要適應更長里數。（留意今年毅行者終點位置更改了）

3. 終極長課訓練

十月最後兩星期可以終極長課，如（雙坳）麥徑3至8段，有些人在加長3至10，視乎目標體能而定。完成雙坳後體能會有好大提升。一般可在30小時內完成比賽。
操麥徑操到悶的朋友或可練習鳳徑70公里，或衛徑全走78公里。踏入11月最後兩星期必須減量，但不要完全停晒，可選擇較輕鬆的港島俓，走部分路段走約25至30公里

雙坳操練的目標時間 = 比賽目標時間［八號檢查站 - 三號檢查站］–２小時

飲食

1. 比賽當日有人陪跑及支援，大會又有檢查站，食物及飲品選擇多咗，飲食過多會使腸胃不適。所以最好練習同比賽時食同飲嘅大致相同，可減低問題出現。

2. 能量飲品及能量食品，部分有咖啡因，（留意一日不能攝取過多）
練習時試食同一牌子的能量飲品及能量產品，不要比賽時才試，口味因人而異及反應會不同，有些人食完過敏會肚屙或嘔吐，一隊四個人可能各有各的喜好，記得比賽前買足彈藥。

各人對能量食品的接受程度不同，趁操練時試啱適合自己的口味呀！

更多能量食品選擇

裝備

衣著，包括衫褲鞋襪背囊，10月、11月練習嗰套最好同比賽嗰套一樣，大家有個磨合期，知道對鞋著得舒唔舒服，會唔會起水泡，衫褲亦都係，會唔會有磨的情況出現，容易磨的位置之前需貼定膠布或搽定潤滑劑。

有些人會放多一套或以上衫褲鞋襪以便替換，替換後記得搽返防磨劑，如天氣突變又凍熱或落雨更加需要替換，去到荃錦坳較多人會換鞋，因為最後兩段，較多石屎路，以跑路為主，好多人會換上較輕便的跑鞋，較為舒適及可以加快步速。當然亦有人一套衫褲鞋襪不需替換去到終點，因應你平時的習慣而決定。

練習時一般背囊會有收工衫褲及當天全日糧水比較重，比賽當日可能有陪跑，參賽者只帶個腰包或小背囊，有些人背囊也不帶，會輕好多，所以毅行者當日會比平時跑快左，另外因現場興高采烈的氣氛，會使大家有個假像覺得當日狀態特別好而走快了，一般前段都不會有問題發生，但因為不是平時練習的速度，好多人去到50公里以上，由其針草帽就會出現跌速或爆，要捱到返終點，最後比原定時間仲要慢。所以頭50公里一定要忍腳，不要比練習時快，有能力去到上針山才加速都未遲。